Après donar las autorizacions logisticas que fan mestièr e après publicar l’eveniment al programa oficial, la comuna de Pau anóncia que Libertat son pas autorizats d’ocupar la carrièra. Pasmens, après dialogar, los concèrts se tendràn uèi.

La comuna de Pau contunha son braç de fèrre amb lo movement occitanista d’esquèrra Libertat. “48 oras abans la serada organizada dens l’encastre de la Hèsta de la Musica au Barri deu Hedars, la mairia de Pau que càmbia d’avís e qu’arrefusa tot eveniment a la Tor deu Borrèu”, çò rapòrta La Setmana. Libertat declara qu’aquesta “non-autorizacion que s’ei hèita jos pretèxte que las fòrças de seguretat n’an pas la capacitat d’assegurar la seguretat deu public aqueth dia”.
 
Pasmens, lo movement occitanista obtenguèt ben de la comuna la permission d’installar un empont, un brancament electric e una autorizacion de bar, e los concèrts programats per Libertat son ben anonciats dins lo programa de la Fèsta de la Musica. “Qu’ei ua error”, çò reconeissiá la comuna a Sud-Ouest.
 
 
Los concèrts se faràn
 
Malgrat tot, los concèrts se faràn. Après d’escambis amb de responsables e pròches de la comuna, Libertat assegura que i aurà pas d’empache de part de las autoritats. En mai d’aquò, la polícia serà en plaça e “tot se passarà plan”, çò asseguran los de la còla de Libertat, que convidan los legeires a i anar “passar un bon moment conviviau, en familha, a partir de 16 oras”.
 
Julian Cazenave a manifestat son incompreneson a France Bleu.